દેશમાં માર્ગ અકસ્માતોની સંખ્યા ઝડપથી વધી રહી છે.
આધુનિક ટેકનોલોજીએ મનુષ્યની જિંદગી બહુ આસાન બનાવી દીધી છે. પરંતુ આ ટેક્નોલોજીમાં રહેલી ક્ષતિઓ અને નાનકડી માનવીય ભૂલ ભયંકર હોનારત સર્જે રહી છે. નવી પેઢીનાં માથાં રસ્તાઓ પર નાળિયેરની જેમ વધેરાઈ રહ્યા છે. નૂતન શ્રીમંતોનાં સંતાનો પિતાશ્રીની મોટરકારો બેફામ ચલાવી રહ્યાં છે. રાજ્યમાં હાઈવે પર ગમે ત્યાં વાહનો ઊભા હોય છે. સાંજ પછી તો એ દેખાતા જ નથી. એટલે પણ અકસ્માતોની હારમાળા સર્જાય છે.
ઝડપી વાહન દોડાવવાની ટેવ ધરાવનારની સંખ્યા વધુ
આજે ગુજરાત રાજ્ય સહીત સમગ્ર દેશમાં અકસ્માતોની ઘટના ચિંતાજનક બની છે. દિનપ્રતિદિન ગંભીર અકસ્માતોની ઘટનાઓ સામે આવી રહી છે. જેમાં ઘણા કિસ્સામાં વ્યક્તિઓ દિવ્યાંગ બન્યા છે તો ઘણામાં મોતને ભેટ્યા છે. સરકાર દ્વારા તથા ટ્રાફિક પોલીસ વિભાગ દ્વારા આ બાબતે અનેક વખત સાવચેત કરવામાં આવે છે. પરંતુ આજના સમયે તેજ રફ્તારના ઘેલા અક્સ્માતોનુ મુખ્ય કારણ છે. તદુપરાંત આડેધડ ડ્રાંઇવિંગ , પાર્કિંગ, રસ્તે રખડતા પશુઓ ,ઉબડ ખાબડ રસ્તા, ચાલકની અપૂરતી ઊંઘ ,તથા ડિઝાઇન અને માર્ગ ઉપર જરૂરી સુવિધા – સુરક્ષાનો અભાવ પણ કારણભૂત છે.
રાજ્યમાં દરરોજ 40થી વધુ અકસ્માતની ઘટનાઓ
આ ઉપરાંત આગ લાગવાની ઘટનાઓ ઓટોમેટિક લોક સિસ્ટમના કારણે પણ લોકો મોતને ભેટ્યા હોવાના કિસ્સા છે. તેમાંય પાછું વાહનોમાં મોટા અવાજવાળી સાઉન્ડ સિસ્ટમ અને મોબાઈલ ફોનનો ઉપયોગની વાત જ શું કરવી, ખાસ કરીને આજનું યુવાધન ફૂલ વોલ્યુમ રાખી કાર હંકારતા નજરે ચડી રહ્યા છે. તો વળી, વાહન કોઈપણ હોય પણ ચાલક ચાલુ વાહને ફોન ઉપર વાતો કરતો નજરે ચડી રહ્યો છે. ચાલુ વાહને મોબાઇલફોન ઉપર વાતો કરતા અથવા મોટા અવાજે સંગીત સાંભળતા ચાલક બેધ્યાન બને તેવી શક્યતાને નકારી શકાય નહિ. વાહનચાલકોએ ચાલુ વાહને મોબાઈલ ફોનનો ઉપયોગ અને મોટા અવાજે મ્યુઝિક સાંભળતા વાહન હંકારવાનું ટાળવું જોઈએ.
વધતી વાહનોની સંખ્યા સાથે વધતા અકસ્માતો
પ્રતિવર્ષ અકસ્માતમાં સરકારી ચોપડે નોંધાયેલ મૃતકોના આંકડાઓ ખરેખર ચિંતા જતાવે છે. કેન્દ્ર સરકારે જાહેર કરેલા આંકડા પ્રમાણે દેશમાં દર વરસે દોઢ લાખથી વધુ લોકો સડક દુર્ઘટનાઓમાં મોતનો શિકાર બને છે. તેમાંથી 60 ટકા લોકો 18-34 વર્ષની વય જૂથના છે. આ બાબતની ગંભીરતા સમજી પ્રશાશન જાગૃતતા ફેલાવવા સાથે લોકોના જીવ બચાવવા દંડાત્મક પ્રકિયા હાથ ધરતા લોકોને તે ગમતું પણ નથી. પણ , એવું નથી વિચારતા કે, પ્રશાશન કેમ બરાડા પાડી રહ્યું છે. કોની માટે કાર્યવાહી કરી રહ્યું છે. માર્ગ ઉપર પણ છબીઓ થકી અકસ્માતથી બચવા વાહનો ધીમે હાંકવા અથાગ પ્રયાસો કરી રહ્યું છે. ખરેખર વાહનો સલામત રીતે હાંકવામાં આવે તો ચોક્કસ પણે અકસ્માતોની ઘટનાઓ ઘટી શકે છે.
સ્પીડ લિમિટ, બ્લેકસ્પૉટ, હાઇ બીમ ડ્રાઇવિંગ, ઑવરટેકિંગ વગેરે વિશે માહિતીનો અભાવ
વાહનની ગતિશીલતા પણ નિરંકુશ હોય તો કારચાલક પોતાના સહિત બધા સવારોને લઈને સ્વયં મોતના મુખમાં કૂદે છે. આપણા દેશમાં હેલ્મેટની ઉપેક્ષા છે એવી જ સીટબેલ્ટની પણ છે. જ્યાં સુધી સમાજ મદદ નહીં કરે, માનવ વર્તન બદલાશે નહીં અને કાયદાનો ભય નહીં રહે ત્યાં સુધી દેશમાં માર્ગ અકસ્માતો પર અંકુશ નહીં આવે.
BY KALPESH MAKWANA ON DECEMBER 12, 2024
