વડોદરા મનપાના અનેક પ્રોજેક્ટ પડી ભાંગ્યા, તો ઘણા વર્ષોથી કાગળ પર!

પ્રોજેક્ટ પૂર્ણ કરવામાં વિલંબ, પ્રોજેક્ટ પૂર્ણ થતા મેન્ટેનન્સનો અભાવ નુકસાનકારક

અનેક આવાસ યોજના વર્ષો બાદ પણ અધૂરી રહેતા ભટકતા લાભાર્થીઓ

વડોદરા મહાનગરપાલિકા દ્વારા વડોદરા શહેરના વિકાસ અને નગરજનોની સુવિધા તથા સુરક્ષા માટે વિવિધ વિકાસ – સુવિધાલક્ષી કામો આયોજન હેઠળ લેવાય છે. જે સફળ થતા શહેરના વિકાસને વેગ મળે છે. જેમકે, સિંધરોટ પાણી પ્રોજેક્ટ, જનમહલ બસ ટર્મિનલ, નવા ફાયર સ્ટેશન, કમાન્ડ એન્ડ કંટ્રોલ સેન્ટર, નવી કચેરીઓ, બાગ- બગીચા, તળાવોના બેટીફીકેશન, લાલબાગ, અટલ, ફતેગંજ સહિતના બ્રિજ, ડ્રેનેજ પ્રોજેક્ટ, પહોળા રસ્તાઓ, નવી કચેરીઓ સહિત અસંખ્ય પ્રોજેક્ટનો સમાવેશ થાય છે. બજેટની જાહેરાતમાં હાથ ધરાતા મહત્વના ઘણા પ્રોજેક્ટ વર્ષોથી ચોપડા ઉપર દોડી રહ્યા છે. તો અનેક પ્રોજેક્ટ પડતા મુકાયા છે સાથે કેટલાક પ્રોજેક્ટ નિષ્ફળ જતા જનતાના નાણાનો વેડફાટ પણ થયો છે. જેથી અમે અહીં પાછલા સાત વર્ષ દરમિયાન બજેટમાં રજૂ થયેલા મહત્વના વિષયો ઉપર પ્રકાશ પાડવાનો પ્રયાસ કર્યો છે. આપને જણાવી દઈએ કે, ભૂતકાળના બજેટોમાં મોટા ઉપાડે જનતાની સુવિધા સુરક્ષા માટેના નિત નવા આયોજન દર્શાવી પ્રસિદ્ધિ મેળવતા નેતાઓ અને અધિકારીઓ ઘણા પ્રોજેક્ટ પૂર્ણ કરવામાં નિષ્ફળ પણ નીવડ્યા છે. દીપક ઓપન એર થિયેટર, આજવા રોડ રાત્રી બજાર, છાણી પ્રવેશ દ્વાર દુકાનો અને રાત્રિ બજાર, સાયકલ ટ્રેકો, ટુરિસ્ટ ઇન્ફર્મેશન સિસ્ટમ જેવા અનેક પ્રોજેક્ટો પાછળ ખર્ચ માથે પડ્યો છે. જ્યારે ઇ .આર. પી, સ્કાડા , સફારી પાર્ક, એચ.એમ.આઇ. એસ., બ્રીજો, વિશ્વામિત્રી શુદ્ધિકરણ જેવા અનેક પ્રોજેક્ટ કરોડો રૂપિયાના ખર્ચા બાદ પણ હજુ લોક સુવિધા માટે સંપૂર્ણપણે ઉપયોગી બની શક્યા નથી. અને પાણીના મીટર , 24 કલાક પાણી, ફાયર સ્ટેશન, ઈલેક્ટ્રીક વાહનો અને ચાર્જિંગ સ્ટેશન સહિતના અનેક પ્રોજેક્ટ વર્ષોથી કાગળ પર દોડી રહ્યા છે.

– સાત વર્ષમાં બજેટ 3554 કરોડથી વધી 6200 કરોડ થયું

*વર્ષ 2019 – 20 દરમ્યાન મ્યુનિસિપલ કમિશનર અજય ભાદુએ 3554 કરોડનું બજેટ રજૂ કર્યું હતું.

*વર્ષ 2020-21 દરમિયાન મ્યુનિસિપલ કમિશનર નલિન ઉપાધ્યાયએ 3770 કરોડનું બજેટ રજૂ કર્યું હતું.

*વર્ષ 2021 -22 દરમ્યાન મ્યુનિસિપલ કમિશનર સ્વરૂપ પી. એ 3804 કરોડનું બજેટ રજૂ કર્યું હતું.

*વર્ષ 2022 – 23 દરમ્યાન મ્યુનિસિપલ કમિશનર ચાંદની અગ્રવાલ એ 3841 કરોડનું બજેટ રજૂ કર્યું હતું.

*વર્ષ 2023 -24 દરમ્યાન મ્યુનિસિપલ કમિશનર બંછાનીધી પાનીએ 4761 કરોડનું બજેટ રજૂ કર્યું હતું.

*વર્ષ 2024- 25 દરમ્યાન મ્યુનિસિપલ કમિશનર દિલીપ રાણાએ 5523 કરોડ નું બજેટ રજૂ કર્યું હતું.

*વર્ષ 2025 -26 સંદર્ભનું મ્યુનિસિપલ કમિશનર દિલીપ રાણાએ 6200 કરોડનું બજેટ રજૂ કર્યું છે.

– પાછલા સાત વર્ષના બજેટ ઉપર પ્રકાશ પાડતા મહત્વની કડીઓ હાથે લાગી

* વર્ષ 2019 -20ના બજેટ ઉપર પ્રકાશ

વર્ષ 2019 -20 દરમિયાન રજૂ થયેલ બજેટમાં અલકાપુરી વિસ્તારમાં 5 કરોડના ખર્ચે મલ્ટી લેવલ પાર્કિંગ ,વડસર ટ્રી મ્યુઝિયમ ખાતે 50 લાખના ખર્ચે સાઇકલ ટ્રેક ,1 કરોડના ખર્ચે વોટર એટીએમ , 86 કરોડના ખર્ચે સ્માર્ટવોટર ઓડિટ પ્રોજેક્ટ, 23 કરોડના ખર્ચે ઇન્ટેલિજન્ટ ટ્રાન્ઝિસ્ટ મેનેજમેન્ટ સિસ્ટમ, 20 કરોડના ખર્ચે એચ.એમ.આઇ.એસ એન્ડ હેલ્થ સીટી કાર્ડ, પબ્લિક બાઈસીકલ શેરીંગ પ્રોજેક્ટ, એ બી ડી વિસ્તાર સયાજીગંજ , વડીવાડી ,અકોટા ખાતે પાણીના મીટરો, 2 કરોડના ખર્ચે ટીપી 13 નર્મદા કેનાલ ખાતે જોગીગ ટ્રેક તેમજ પિકનિક સેન્ટર, કારેલીબાગ ગોવિંદ નગર ખાતે 1.30 કરોડના ખર્ચે શહેરીવન, 55 કરોડના ખર્ચે આજવા ખાતે પી પી પી ધોરણે સફારી પાર્ક પ્રથમ ફેઝ સહિતના આયોજન હતા.

* વર્ષ 2020 -21ના બજેટ ઉપર પ્રકાશ

વર્ષ 2020-21 દરમિયાન રજૂ થયેલ બજેટમાં 300 કરોડના ખર્ચે વૃંદાવન , ખોડીયાર નગર , સરદાર એસ્ટેટ, સંગમ ,વાસણા ,સમા તળાવ, માણેક પાર્ક ખાતે બ્રિજનું આયોજન, 50 કરોડના ખર્ચે માંજલપુર થી અટલાદરા બ્રિજનું આયોજન, કારેલીબાગ ખાતે 8 કરોડના ખર્ચે નવું ફાયર સ્ટેશન, ગોત્રી ગાયત્રી નગર ખાતે 7 કરોડના ખર્ચે નવું સ્ટેડિયમ, 5 કરોડના ખર્ચે પ્રેસ વિભાગ માટે નવી ઈમારત, 2 કરોડના ખર્ચે નવી આર્ટ ગેલેરી, 29 કરોડના ખર્ચે ઇઆરપી પ્રોજેક્ટ, 20 કરોડના ખર્ચે એચ એમ આઇ એસ પ્રોજેક્ટ, 120 કરોડના ખર્ચે સ્માર્ટ વોટર ઓડિટ પ્રોજેક્ટ સહિતના આયોજન હતા.

* વર્ષ 2021 -22ના બજેટ ઉપર પ્રકાશ

વર્ષ 2021 -22 દરમિયાન રજૂ થયેલ બજેટમાં 1 કરોડના ખર્ચે પ્રાણી સંગ્રહાલયમાં સિક્યુરિટી વોચ ટાવર, કારેલીબાગ ગોવિંદ નગર ખાતે બાયોડાઇવર્સિટી પાર્ક, વડોદરા રેલ્વે સ્ટેશન સામે લેન્ડસ્કેપ આયલેન્ડ સહિતના આયોજન હતા.

* વર્ષ 2022 -23ના બજેટ ઉપર પ્રકાશ

વર્ષ 2022 -23 દરમિયાન રજૂ થયેલ બજેટમાં 4 -4કરોડના ખર્ચે બદામડી બાગ અને વેમાલી ખાતે નવું ફાયર સ્ટેશન, ઈલેક્ટ્રીક વાહનો માટેના 4 ચાર્જિંગ સ્ટેશન, બાયો કલ્ચર ડાઈવર્સિટી પાર્ક, 29 કરોડના ખર્ચે ઇ આર પી પ્રોજેક્ટ સહિતના આયોજન હતા.

* વર્ષ 2023 -24ના બજેટ ઉપર પ્રકાશ

વર્ષ 2023- 24 દરમિયાન રજૂ થયેલ બજેટમાં 25 કરોડના ખર્ચે વડોદરા ઇન્ટરનેશનલ કલ્ચરલ સેન્ટર અને હેરિટેજ સ્ક્વેર, 75 કરોડના ખર્ચે 4 ઝોનમાં ઈ બસ માટે ચાર્જિંગ સ્ટેશન, શહેરના વિવિધ વિસ્તારોમાં 10 કરોડના ખર્ચે ઈલેક્ટ્રીક વાહનો માટેના ચાર્જિંગ સ્ટેશન, 1 કરોડના ખર્ચે વડોદરા મનપા માટે ઈલેક્ટ્રીક વાહન ખરીદવા, કચરા કલેક્શન માટે ઇલેક્ટ્રીક વાહનો ખરીદવા, ઈલેક્ટ્રીક વાહનો માટેની પોલીસી બનાવવી, 5 કરોડના ખર્ચે 75 ફુવારા લાઇટિંગ સાથે, વિશ્વામિત્રી શુદ્ધિકરણ યોજના હેઠળ 146.25 કરોડના 22 કામો, સ્વચ્છતા માટે 80 લાખના ખર્ચે 38 ઇ રીક્ષા, 4 જૂન માટે 1.60 કરોડના ખર્ચે 8 ઇલેક્ટ્રીક વાહનો, 80 લાખના ખર્ચે 10 નંગ ઇલેક્ટ્રિક કાર, 10 કરોડના ખર્ચે આર્ટિફિશિયલ ઇન્ટેલિજન્સ લેબ, ચાર કરોડના ખર્ચે વિશ્વામિત્રી નદીના 17 લોકેશન પર એઆઇ આધારિત પીટીઝેડ કેમેરા તથા ડ્રોનની મદદથી મોનિટરિંગ, 1 કરોડના ખર્ચે કેમેરા તથા એ આઈ ની મદદથી સ્માર્ટ પે એન્ડ પાર્ક, સ્માર્ટ, મોડલ, મહત્વના રોડ પર 50 લાખના ખર્ચે એન્ફોર્સમેન્ટ સિસ્ટમ, 50 લાખના ખર્ચે મોનિટરિંગ, ફીડબેક ,કમ્પ્લેન, ડિજિટલ ડેસ્કબોર્ડ, 1500 કરોડના ખર્ચે વડોદરા પાલિકા ફરતે ટ્રાન્સીટ ઓરિએન્ટેડ કોરિડોર, 13 કરોડના ખર્ચે સોમા તળાવ, હરણી, ટીપી 1, સયાજીપુરા ખાતે 4 નવા ફાયર સ્ટેશન બનાવવા સહિતના આયોજન હતા.

* વર્ષ 2024 -25ના બજેટ ઉપર પ્રકાશ

વર્ષ 2024 -25 દરમિયાન રજૂ થયેલ બજેટમાં 125.73 કરોડના ખર્ચે સ્માર્ટ સિટી અંતર્ગત સ્કાડા પ્રોજેક્ટ ફેઝ 2, ગોત્રી, સયાજીગંજ, નિઝામપુરા ખાતે 100 ઈલેક્ટ્રીક બસ માટે ચાર્જિંગ સ્ટેશન સાથે બસ ટર્મિનલ, 30 કરોડના ખર્ચે ન્યાય મંદિરમાં હેરિટેજ આર્ટ એન્ડ કલ્ચર મ્યુઝિયમ, 10 કરોડના ખર્ચે લાલ કોર્ટમાં મ્યુઝિયમ તથા આર્ટ ગેલેરી, 150 સ્માર્ટ આંગણવાડી, 11 કરોડના ખર્ચે ૪૬ સ્થળે એસ્પિરેશનલ ટોયલેટ, 7 કરોડના ખર્ચે સયાજીપુરા ખાતે નવું ફાયર સ્ટેશન, ગોત્રી તળાવ તથા હરણી સ્કલપચર પાર્ક ખાતે 6 કરોડના ખર્ચે યોગ સ્ટુડીયો, શહેરને બાયપાસ કરવા ફરતે આઉટર રિંગ રોડ ફેઝ 1 સહિતના આયોજન હતા.

– વર્ષ 2025 -26ના બજેટ ઉપર પ્રકાશ

વર્ષ 2025 -26 દરમિયાન રજૂ થયેલ બજેટમાં 125 કરોડના ખર્ચે સ્કડા ફેઝ2, સમા ખાતે 27.67 કરોડના ખર્ચે નવું નગર ગૃહ, 22 કરોડના ખર્ચે મહાત્મા ગાંધી નગર ગૃહ તોડી નવું બનાવાશે, 8 કરોડના ખર્ચે ખોડીયાર નગર પાસે નવું ફાયર સ્ટેશન, 150 કરોડના ખર્ચે અનગઢ ખાતે 100 એમએલડી ક્ષમતાનો નવો પાણી માટેનો સ્ત્રોત, 100 કરોડના ખર્ચે ખાનપુર શેરખી ખાતે 100 એમએલડી ક્ષમતાનો વોટર ટ્રીટમેન્ટ પ્લાન્ટ, આજવાના 62 દરવાજા માંથી છોડાતું પાણી માપવા ત્રણ કરોડના ખર્ચે ડિજિટલ ડિસ્ચાર્જ મીટર, 20 કરોડના ખર્ચે ડીપ વોટર રિચાર્જ બાય રેઇન વોટર હાર્વેસ્ટિંગ સિસ્ટમ, 300 કરોડના ખર્ચે અલકાપુરી, કાલાઘોડા થઈ જેલ રોડ સુધી બ્રિજનું આયોજન, 90 કરોડના ખર્ચે ભાયલી-અટલાદરા સ્વામિનારાયણ-કલાલી ફ્લાય ઓવર બ્રિજ, 20 કરોડના ખર્ચે ઝોનદીઠ ગેમ ઝોન, 20 કરોડના ખર્ચે મહિલા હોસ્ટેલ, 4 કરોડના ખર્ચે ટુરિસ્ટ ઇન્ફર્મેશન સિસ્ટમ, ગોરવા, બિલ, કારેલીબાગ, જાંબુઆ, અટલાદરા ખાતે 60 કરોડના ખર્ચે નવા ફાયર સ્ટેશન, 15 કરોડના ખર્ચે છાણી કેનાલ પાસે લિનિયર પાર્ક, વિશ્વામિત્રી નદી પુર નિયંત્રણ અને નિવારણ કમિટીના એક્શન પ્લાનનું અમલીકરણ, લાલબાગ, કારેલીબાગ, ગોરવા, અકોટા, તરસાલી, પાણીગેટ, સયાજીબાગ, વડીવાડી પાણીની ટાંકી તોડી નવી બનાવાશે, વડોદરા ગોધરા રેલવે લાઇન ઉપર ઓવર બ્રિજ, પાલિકાના 19 પ્લોટ પાર્કિંગ માટે આરક્ષિત સહિતના આયોજન કરાયા છે.

– અનેક અધૂરા પ્રોજેક્ટ વચ્ચે નવા આયોજનની ગેરંટી છે ખરી ?

એચ.એમ.આઇ.એસ એન્ડ હેલ્થ સીટી કાર્ડ, સ્માર્ટવોટર ઓડિટ , સફારી પાર્ક પાછલા 7 વર્ષથી આયોજન હેઠળ રહ્યા છે. તેવી જ રીતે 6 વર્ષથી કેટલાક બ્રિજ, નવી આર્ટ ગેલેરી , નવા ફાયર સ્ટેશન ગોકળગતિએ ચાલી રહ્યા છે. 5 વર્ષથી બાયોડાઇવર્સિટી પાર્ક, લેન્ડસ્કેપ આયલેન્ડ જેવા આયોજનો રહ્યા છે. 4 વર્ષથી ઈલેક્ટ્રીક વાહનો, ચાર્જિંગ સ્ટેશન, ઇ આર પી પ્રોજેક્ટ પૂર્ણ થઇ રહ્યા નથી. 3 વર્ષથી વડોદરા ઇન્ટરનેશનલ કલ્ચરલ સેન્ટર અને હેરિટેજ સ્ક્વેર, ટ્રાન્સીટ ઓરિએન્ટેડ કોરિડોરનું આયોજન છે. 2 વર્ષથી સ્કાડા પ્રોજેક્ટ , ન્યાય મંદિર, લાલ કોર્ટ મ્યુઝિયમ , યોગ સ્ટુડીયો આયોજન હેઠળ છે. મહત્વનું છે કે, આવા અનેક પ્રોજેક્ટ પૂર્ણ થઇ શક્યા નથી ત્યારે આ વર્ષે મહાત્મા ગાંધી નગર ગૃહ તોડી નવું બનાવવું ,અનગઢ ખાતે નવો પાણી સ્ત્રોત, અલકાપુરી, કાલાઘોડા થઈ જેલ રોડ સુધી બ્રિજ, 5 નવા ફાયર સ્ટેશન, વિશ્વામિત્રી નદી પુર નિયંત્રણ અને નિવારણ કમિટીના એક્શન પ્લાનનું અમલીકરણ, 8 પાણીની ટાંકી તોડી નવી બનાવવી , 19 પ્લોટ પાર્કિંગ માટે આરક્ષિત સહિતના આયોજન સફળ થશે ? અને સફળ થશે તો ક્યારે? તેવો સવાલ લોકમુખે ચર્ચામાં છે.

નોંધ : વડોદરા કોર્પોરેશન સાથે કેન્દ્ર સરકાર, રાજ્ય સરકાર અને વિવિધ ગ્રાન્ટોનો ઉપયોગ વિવિધ પ્રોજેક્ટના ખર્ચ પાછળ થતો હોય છે.

BY KALPESH MAKWANA ON FEBRUARY 01, 2025